Эх сурвалж хэн авмаар байна!

Та бүхнийг түрүүчийн уулзалт дээр зарласан жижиг тэмцээнд бэлдэж байгаа гэж найдаж байна. Өөрт тохиолдсон ямар нэг тохиодлыг өөрийн үзэл бодол, үнэт зүйл, итгэл үнэмшилдээ тулгуурлан дүгнэлт хийсэн эссэ маягийн зүйл бичиж ирүүлэхийг хүссэн байгаа. Шагнал нь "Эх сурвалж" ном. Эссэ хүлээж авах сүүлийн хугацаа 12-ний Пүрэв гараг дуустал. letsdevelop@gmail.com юмуу хөтлөгч Номин миний хаягруу явуулж болно.

Дашрамд хэлэхэд энэ долоо хоногийн лекц 14-ний хагас сайнд 13.00 цагт Хууль зүйн сургууль дээр "Иргэний нийгэм, ардчиллын тухай" сэдвээр болно.

Эх сурвалж

Айн Рэндын аугаа бүтээлүүдийн нэг болох "Эх сурвалж" зохиолыг Номин миний бие тун саяхан ээжтэйгээ булаацалдан байж уншиж дуусгалаа. Уншиж байхад ихэвчлэн дарамттай, бас ичмээр, өрөвдмөөр, хэт онож хэлсэнээс нь болоод ганцаараа чанга инээмээр, заримдаа бүүр уйлмаар ч юм шиг мэдрэмж төрж байлаа. 1984-г зарим үед санагдуулж байсан ч, төгсгөлд нь үнээр урам өгсөн зохиол.
Өөр зүйл хэлмээргүй байна, зүгээр л уншаад үзээрэй гэж зөвлөе. Илүү дэлгэрэнгүйгээр номыг уншигчдын уулзалт ч юмуу клубынхээ уран зохиолын өдрөөр ярилцацгаана гэж найдаж байна.

Уншсан хүнд ямар нэг зүйл "халдварлана" гэдэгт итгэлтэй байна.


Номын эрхлэн хэвлэн гаргагч Монголын Либертари сан номыг ингэж танилцуулжээ:
Эх сурвалж романы ерөнхий өгүүлэмж нь Ховард Роаркийн дүрээр архитектур буюу уран барилга дахь шинэ хуучин хэв маяг, үзэл санааны тэмцэлийн тухай өгүүлсэн мэтээр ойлгогдох юм. Залуу архитектурч Роарк чухамхүү хуучинсаг хэвшмэл стандарт, дундаж зууны уран барилгын хэв маягийг эсэргүүцэж буй хэдий ч үнэн чанартаа түүний тэмцэл нь коллективист үзлийн эсрэг тэмцэж буй индивид буюу хувь хүнийг харуулахыг Айн Рэнд зорьсон ажээ. Нэг үгээр хэлбэл, Эх сурвалж нь коллективизм, альтуруизмын худал хуурмаг тал; эгоизм, индивидуализмын үзэл санааг хоёргүй утгаар магтан дуулсан; философи, социологи, ёс зүй, гоо зүй, сэтгэл зүйн асуудлуудыг хөндсөн хүчирхэг роман юм. Энэ ч утгаараа роман АНУ-ын оюунлаг хүрээнийхний дунд ширүүн маргаан, хэлэлцүүлгийг өрнүүлж байжээ. Монгол уншигчдын дунд ч гэсэн басхүү ширүүхэн маргаан өрнөх нь дамжиггүй юм.

Эрх чөлөөнд суурилсан хөгжлийн тухай яриа - 2009

Цуврал нээлттэй лекц - ярилцлага

Эрх чөлөөг эрхэмлэгч залуусын "Хөгжицгөөе" клубээс Эрх чөлөөнд суурилсан хөгжлийн тухай яриа - 2009 нээлттэй цуврал сургалтыг зохион байгуулах гэж байна.
Энэхүү сургалт нь залууст хувь хүний эрх чөлөө, хувийн өмч, чөлөөт зах зээл, ардчилал, эрх зүйт ёс, иргэний нийгмийн талаарх мэдлэг олгож, нийгмийн аливаа асуудалд эрх чөлөөний зарчим, иргэний эрхийн үзэл баримтлалаар хандах, арга зүйд суралцуулах, чөлөөт нийгмийн үзэл санааг дэмжигч залуусын хүрээг тэлэх зорилготой юм.
Лекцүүдийг бидний үзэл санааг дэмжигч багш нар чиглүүлэн явуулна. Клубын бүх гишүүд, сонирхсон хүн бүр оролцох боломжтой.

Хугацаа: 4 долоо хоног /2009 оны 3-р сарын 7, 14, 21, 28 өдрүүдэд 13.00 цагт/
Болох газар: МУИС- Хууль зүйн сургуулийн 101 тоот танхим

Лекцийн сэдэв
1. Эрх чөлөөний тухай
2. Иргэний нийгэм, ардчиллын тухай
3. Хувийн өмч, чөлөөт зах зээлийн тухай
4. Шударга ёс, эрх зүйт ёсны тухай

Хөгжицгөөе клубын бүх гишүүдийн уулзалт

Хөгжицгөөе клубын бүх гишүүдийн уулзалт болох гэж байна. Уулзалтанд хуучин гишүүд болон клубын үйл ажиллагааг сонирхож буй бусад залуус хүрэлцэн ирэх боломжтой.

Уулзалтанд хүрэлцэн ирснээр:
• Бидний үнэт зүйлс, зарчим
• Бидний түүх
• Бидний цаашдын үйл ажиллагааны талаар мэдээлэл авах болно.

Хэзээ: 2009 оны 2-р сарын 12-ны өдөр 18 цагт
Хаана: МУИС - Хууль зүйн сургуулийн 302 тоот танхим.

Эрх чөлөөний философи

За ингээд манай клубын үндсэн зарчим, үзэл санааг маш энгийн хэрнээ, ойлгомжтой, цэгцтэй илэрхийлчихсэн богинохон presentation-ийг орууллаа. Таалан соёрхоно уу:)



Клубынханаас завтай нэг нь энийг эх хэл дээрээ бэлдээд янзалчихвал бүүр л хүмүүст үзүүлэхэд бүр л амар байх да тэ.

Клубын лого тайлбарлах уралдаан

Сайн уу, залуусаа!

Клубын шинэ хуучин гишүүд болон дэмжигч залуусын дунд клубын логоог тайлбарлах уралдаан зарлаж байна. Бодоод байсан чинь бид анх энэ логоог сонгож байхад логоныхоо илэрхийлж буй санаа, утгыг ярилцаж байсан хэдий ч тоймтой зүйл бичиж тэмдэглэж үлдээгээгүй юм байна. Тэгэхээр Логогоо хамгийн товч, тодорхой бөгөөд оновчтой илэрхийлсэн тайлбар бичлэгийг уралдаан байдлаар шалгаруулж блогтоо байрлуулья гэж бодоод байна. Уралдаанд ирүүлэх логоны тайлбарт ямар нэг хэлбэр, хэмжээний шалгуур тавихгүй. Гол нь клубын үнэт зүйлс, үзэл санаа, зарчим, мөрөөдөлтэй лого нь хэрхэн нийцэж буйг гаргаж ирсэн байх ёстой.

За тэгээд тайлбараа энэ сардаа багтаан letsdevelop@gmail.com хаягаар явуулаарай.

Хөгжицгөөе Клубын Танилцуулга

2006 оны 9 сарын 29-ны өдрөөс эхлэн зохион байгуулагдаж баасан гараг бүрийн 17 цагаас уламжлал болон явагдаж эхэлсэн "Эрх чөлөөнд суурилсан хөгжлийн тухай яриа"-нд оролцогч залуус итгэл үнэмшлээрээ нэгдэж "Хөгжицгөөе" клубыг байгуулсан.

Бид эрх чөлөө хүн бүрт заяамал учир өөрийн хувь заяагаа зөвхөн өөрөө л мэдэх ёстой гэсэн үзэл санааны дор нэгддэг. Бидний зорилго бол эрх чөлөө, ардчилал, шударга ёс, тэгш эрхийн үзэл санааны тухай зохистой ойлголтыг залууст түгээх, үзэл бодлоо солилцох замаар хамтдаа хөгжих юм.

Клубын үйл ажиллагаа гишүүдийн өөрсдийн хүсэл зориг, идэвхид тулгуурладаг, нээлттэй, тэгш эрхийн зарчимд үндэслэн явагддаг билээ. Клуб нь уламжлалт уулзалт ярилцлага, либераль үзэл санааг түгээх сургалт зэрэг нь олон нийтэд чиглэсэн үйл ажиллагаанаас гадна клубын гишүүд өөрсдийн үзэл санааны төлөвшлийг бататгах, чөлөөт цагаа хөгжилтэй бөгөөд үр бүтээлтэй өнгөрүүлэх зорилгоор киноны өдөр, номын өдөр, спорт өдөрлөг, байгалийн аялал зэргийг зохион байгуулдаг.

Бидний зохион байгуулсан зарим үйл ажиллагаанаас:
"Оюутны форум", Төрийн ордон, 2008 оны 2 сар
"Либертари аян", их дээд сургуулиуд, дунд сургуулиудад зориулсан сургалт
"Эрх чөлөөнд суурилсан хөгжлийн тухай яриа" цуврал уулзалт ярилцлага.